Lýsing

Í Statinum leggur Platon fram sína statslæru, seinni endurskoðaði hann hana eitt sindur í Lógunum. Hann sær statin í samsvari við mannasálina og teir tríggjar partarnar, hon er samansett av: skynsemi, vilja og innantrongd. Idealstaturin skal hava tríggjar samsvarandi stættir: Teir sum stjórna skulu vera teir klókastu og best útbúnu, t.e. heimspekingarnir; vaktararnir ella hermenninir er tann stættin, sum svarar til dirvið og viljan; vinnulívsmenninir skulu samsvara til girndirnar. Hvør av hesum stættunum hevur sína egnu serstøku dygd, sum er ávikavist vísdómur, dirvi og hóvsemi, og tá ið tað rætta lutfallið er millum stættirnar í statinum (samsvarandi teir tríggjar partarnar í sálini hjá einstaklinginum) verður eisini tann fjórða dygdin, rættvísið, gjørd til veruleika.