Høgni gongur í 3.g á náttúrubreytini á Glasi og arbeiðir aftan á skúlatíð á Býarbókasavninum. Hann lesur nógv, og hann fer við íblástri úr lesnaðinum at hugsa um øll tey, sum eru horvin við Trælanípuna. Hvussu ber tað til, at eingin farvegur sæst eftir tey? Tað er, sum um fólkini eru vorðin flutt inn í ein annan heim.

Høgni fer út til Trælanípuna, og stutt eftir er hann í einum føroyskum umhvørvi, har tíðin ferðast øðrvísi enn í hansara Føroyum. Har tað er meiri enn eitt univers, og har fólk ferðast úr framtíðini, men koma aftur í fortíðini. Har “ormahol” hjá Einstein eru ein veruleiki saman við hamum av deyðum fólki og hóttandi vampýrum.