Hetta er fyrsta bókin, ið Gerhard Lognberg letur úr hondum. Í hesi bókini viðger hann barna-, ungdóms- og manndómsárini.
Hann greiðir frá ymiskum, til dømis Skopunar Útróðrarfelag, frá tí, at tað varð stovnað i 1952, og fram til, at Sólarris varð til í 1968 fram til dagin í dag.
Eisini viðger hann í bókini, tá Føroya Fiskavirking skuldi niðurleggja Sólarris. Hendan kampin vunnu skopuningar saman við Gerhardi.
Hann viðger eisini tey fjúrtan árini, hann sat á í tingi. Tá gingu bylgjurnar mangan høgt, tí Gerhard valdi ikki at boyggja seg fyri losjufólkunum, sum lógu ytst á vinstravonginum í Javnaðarflokkinum.
Eisini greiðir hann frá, tá hann varð koyrdur úr Javnaðarflokkinum á ein heldur lúnskan máta.
Hann plagar at siga, at hann helt seg hava fingið nógv burturúr í kommunal- og landspolitikki. Tú fær einki av skafti einsamallur, men saman við góðum fólki ber alt til.
Tann politiska lívsleiðin er slítandi fyri ein sjálvan og síni nærmastu. Hóast tað, so hevur Gerhard megnað at stýrt millum Skerini, og hevur hann staðið fast við sítt saman við góðum fólki. Uttan dyggan stuðul frá teimum nærmastu uttan um seg, og kristna grundvøllin, so hevði neyvan verið gjørligt at hildið kósina, og bart fyri teimum málum, ið stóðu honum nær.