Description

Hon blundaði, hann lá ikki oman á sær longur, snorkini trokaðu seg inn í gittarsolo´ina, í summarnáttina. Tá hon aftur hugdi, sá hon beint inn í eyguni á veðrinum, forvitin eygu, vitandi, medvitandi. Visti náttúran altíð best?
Nú vildi hon ikki vita meira, best var at gloyma, skúgva til viks. Veðrurin tyktist blunka til hennara. Samdur.
Kanska visti hon, at tá summarið og heystið vóru horvin inn í veturin, fór hon at sita á knallertini, síni reyðu Puch trý gir, á vegnum langt har niðri, fór kikka eftir ondini, meðan kavaódnin kom á seg.

Summarið varar ikki alt árið longur er eitt sjálvstøðugt framhald av skaldsøguni Gentan í verðini og fer fram í Havn miðskeiðis í 1970’unum.
Tann innhugsna gentan gongur í studentaskúla í Hoydølum og roynir at fóta sær á gáttini til
vaksnamannalívið og í lívinunum har heima, har dagarnir og -næturnar eru merktar av ótryggleika.
Og hon hevur eitt loyndarmál, sum ongin má vita nakað um.