Nú verður sjónleikurin Hamlet at síggja á palli  í Føroyum. Nógv visti William Shakespeare og góðar ímyndingargávur hevði hann, men valla hevur hann hugsað ella dugað at sæð fyri sær, at tað, sum hann skrivaði við fjøðurpenni sínum í glæmuni frá kertustubbunum í London 1601, skuldi verða framført á føroyskum fýra øldir seinni.
Hesin sjónleikur er farin um allan heim. Frásøgnin um danaprinsin Hamlet hevur gjørt áskoðarunum stóran mun. Mong eru tey floygdu orðini, sum her standa og eru vorðin partur av mentanararvi mannaættarinnar.
Nú kunnu vit eisini hoyra ,,At vera ella ikki” og ,,Okkurt er rotið í Danmark!”