Lýsing

Marjun Syderbø Kjelnæs hevur megnað at fanga tað surrealistika limbo-líknandi vakuumið tað er, at koma aftur í sítt barnakamar. Myndamálið er so beinrakið, at Gentukamarið stendur ljóslivandi fyri einum. Tað er tí ringt ikki at lata seg taka aftur í sítt egna gentukamar.  Aftur til allar tær kenslurnar og dreymarnir, hetta rúmið fataði um. Ein bladað kensla  av at vilja vekk og tráan eftir at verða hangandi.
Humorin hjá Marjun prikar og er ikki at taka feil av, leikurin Gentukamarið er intelligentur og óhugnaligur, men eisini satt undirhald við klárum kynspolitiskum undirtónum.
Sum heitið sigur, er hetta ein kamarleikur: leikstaðið eitt greitt avmarkað rúm, tíðin avmarkað til eitt samdøgur, persónar so fáir, sum hugsað kann, og dentur á tí sálarliga. Við svørtum humor verður víst, hvussu fortíðin og nútíðin hjá einstaklinginum, nærri tilskilað hjá einari kvinnu, ofta í irrationellari blanding, stýra sjálvsfatan og gerðum hennara.