Description

Harry hevur nú fingið ta døpra, hættisligu og eftir øllum at døma ógjørligu uppgávu at skula finna og beina fyri seinastu horcruxunum hjá Voldemort. Ongantíð áður hevur hann kent seg so einsamallan, ongantíð hevur lagnan kenst so tung. Men Harry noyðist onkursvegna at finna ta styrki inni í sær sjálvum, sum krevst at fullføra uppgávuna, honum litin í hendi. Hann má fara úr fjálgu Kaninholuni, og óttaleysur, uttan at iast, má hann ganga miskunnarleysu gøtuna, sum honum er ætlað at fara…

Í hesi seinastu bókini um Harry Potter, teirri sjeyndu í raðnum, svarar J. K. Rowling hegnisliga teimum mongu spurningunum, ið so mong hava bíða spent eftir. Øll søgan um Harry Potter hevur hugtikið lesarar í millióntali kring allan heim, síðan fyrsta bókin kom í 1997. Besta prógvið um, at høvundurin er sannur meistari at siga eina góða søgu, er, at bøkurnar verða lisna umaftur og umaftur og eru týddar til flest øll heimsins tungumál.