Plantur til matna er ætlað sum frálærutilfar og íblástur til at menna føroyska vitan um grønmeti og grønmetisframleiðslu bæði hjá leikum og lærdum.

Bókin er úrslit av eini verkætlan hjá Búnaðarstovuni í samstarvi við Nám. Skrivað hevur Sigga Rasmussen, cand.hort. við drúgvum royndum í plantufrøði, undirvísing og dyrking í Føroyum. Bókin er fyrst útgivin sum teldutøk sBók og nú eisini sum prentað bók, so at fleiri kunnu fáa nyttu av tilfarinum.

Í bókini eru fleiri enn 150 ymisk grønmeti umrødd, ið kunnu trívast í Føroyum, tá umstøðurnar eru hóskandi. Nú matmentanir broytast, matvørutrygd og heilsugóður kostur eru á breddanum, og stuttflutt grønmeti er eftirspurt, er umráðandi at hava hollar royndir og vitan at byggja á. Hóast avmarkað er av skipaðum royndarvirksemi, gevur henda bókin eitt djúptøkið innlit í møguleikarnar bæði hjá vinnuni og til heimabrúk.

Myndirnar hevur Sigga Rasmussen sjálv tikið í Føroyum, og tær stuðla frálæruni við ítøkiligum dømum og royndum úr  heimligum umhvørvi.