Leikum fagurt er ein satirisk lýsing av tí politiska lívinum í Føroyum í 30-árunum.
Hon er eisini kærleikssøgan millum tann veika læraraskúlanæmingin Tormann og ta sterku seymikonuna Elsbu. Høvuðssøgugongdin er kortini um Íhaldsflokkin, sum er ein sambandsflokkur, og Framtaksflokkin, sum er ein sjálvstýrisflokkur, og hvussu hesir flokkar, mest sum av gomlum vana, klandrast og leypa á hvønn annan í bløðunum Dagens Emne og Bergmál. Alt samalt rættiliga meinaleyst og orðabrask. Tað vandamikla kemur ikki upp í politikkin, fyrr enn reiðarin og keypmaðurin Bakka-Hanus fær eina opinbering frá Guði. Hann skal stovna ein átrúnaðarligan flokk, sum skal bjarga Føroyum og sjálvandi serstakliga handlinum hjá Bakka-Hanusi, sum er um at fara á heysin.