Description

Høvundurin, sum skrivaði søgurnar um Læars og Anni-Lenu og aðrar skemtiligar søgur og tættir, var ættaður av Sandi, føddur 26. september 1918, doyptur Mourits Nikolaj Mohr og í heimbygdini nevndur við kelinavninum Molle. Hann gekk í skúla á Sandi, tók preliminerprógv á Høng gymnasium, og tók læraraprógv í Havn 1942. Var fyrst lærari á Fólkaháskúla, síðan Kommunuskúlanum í Havn. Var lærari á Tekniska kvøldskúla, har hann m.a. umsetti eina geometri til skúlan. Hann spældi violin og var við í Kamarorkestri Tórshavnar musikkskúla. Undir søgum og tættum brúkti hann sum oftast sítt egna navn ella merkið M.N.M. ella skaldnavnið Óðin Ódn. Onkuntíð, hann yrkti á donskum, skrivaði hann Odin Orkan undir. Hann doyði í 1956 bert 38 ára gamal.